ખેરગામ પોમાપાળ પ્રાથમિક શાળામાં વિદ્યાર્થીઓને શૈક્ષણિક કીટનું વિતરણ ખેરગામ, તા. 18 જૂન 2026: ખેરગામ તાલુકાની પોમાપાળ પ્રાથમિક શાળામાં વિદ્યાર્થીઓના શૈક્ષણિક વિકાસને પ્રોત્સાહન આપવાના ઉદ્દેશ્યથી શૈક્ષણિક કીટ વિતરણ કાર્યક્રમનું આયોજન કરવામાં આવ્યું હતું. ખેરગામના પોમાપાળ ફળિયાના સામાજિક અગ્રણી તથા LIC ડેવલપમેન્ટ ઓફિસર શ્રી જયેશભાઈ પટેલના પરિવારના સૌજન્યથી વિદ્યાર્થીઓને શૈક્ષણિક કીટનું વિતરણ કરવામાં આવ્યું. નોંધનીય છે કે તેમના પરિવાર દ્વારા છેલ્લા આઠ વર્ષથી સતત અને નિઃસ્વાર્થ ભાવથી આ સેવાકીય કાર્ય કરવામાં આવી રહ્યું છે, જે શિક્ષણ પ્રત્યેની તેમની પ્રતિબદ્ધતા અને સમાજસેવાની ભાવનાનું ઉત્તમ ઉદાહરણ છે. આ પ્રસંગે તાલુકા પંચાયતના પૂર્વ સદસ્યશ્રી વિભાબેન પટેલ, શ્રી કલ્પેશભાઈ પટેલ, શ્રી પંકજભાઈ પટેલ તેમજ શાળાના શિક્ષકગણ અને સ્ટાફ ઉપસ્થિત રહ્યા હતા. મહાનુભાવોએ વિદ્યાર્થીઓને મન લગાવી અભ્યાસ કરવા અને જીવનમાં આગળ વધવા પ્રેરણા આપી હતી. કાર્યક્રમના અંતે શાળા પરિવાર વતી શાળાના આચાર્યશ્રી વાસંતીબેન પટેલે શ્રી જયેશભાઈ પટેલ અને તેમના પરિવારનો આ ઉમદા સહયોગ બદલ હૃદયપૂર્વક આભાર વ્યક્ત કર્યો હતો.
કપરાડાની આમધા પ્રાથમિક શાળામાં આદિવાસી દિવસની સંસ્કૃતિ સાથે ઉજવણી
કપરાડા તાલુકાની આમધા પ્રાથમિક શાળામાં વિશ્વ આદિવાસી દિન નિમિત્તે બાળકો અને વાલીઓ આદિવાસી સંસ્કૃતિથી વધુ પરિચિત થાય અને સંસ્કૃતિની જાળવણી કરે તેમજ જુદી જુદી લોકબોલીથી પરિચિત થાય એ હેતુથી સહભ્યાસિક પ્રવૃત્તિ અંતર્ગત વિશ્વ આદિવાસી દિનની ઉજવણીના ભાગરૂપે જુદી જુદી પ્રવૃત્તિ કરવામાં આવી હતી.
લોકબોલીમાં વાર્તા, ચિત્ર સ્પર્ધા વારલી પેઇન્ટિંગ, પ્રોજેક્ટર પર આદિવાસી સંસ્કૃતિનું નિદર્શન, આદિવાસી સંગીત સાધનોનું પ્રદર્શન, નેતાનો પરિચય, આદિવાસી વેષ ભૂષા, રેલી અને આદિવાસી વાનગી જેવી પ્રવૃત્તિનું આયોજન કરવામાં આવ્યું હતું.
જેમાં વિદ્યાર્થીઓ અને વાલીઓએ ખૂબ ઉત્સાહભેર ભાગ લીધો હતો. પ્રીતિ ભોજનના રૂપમાં આદિવાસી વાનગી પનેલા તથા પેજવું (ભડકું) પણ બાળકોએ આરોગી આદિવાસી દિવસની યાદગાર ઉજવણી કરી હતી.
સૌજન્ય : માહિતી બ્યુરોઃ વલસાડ તા. ૧૦ ઓગસ્ટ
Comments
Post a Comment