ખેરગામ પોમાપાળ પ્રાથમિક શાળામાં વિદ્યાર્થીઓને શૈક્ષણિક કીટનું વિતરણ ખેરગામ, તા. 18 જૂન 2026: ખેરગામ તાલુકાની પોમાપાળ પ્રાથમિક શાળામાં વિદ્યાર્થીઓના શૈક્ષણિક વિકાસને પ્રોત્સાહન આપવાના ઉદ્દેશ્યથી શૈક્ષણિક કીટ વિતરણ કાર્યક્રમનું આયોજન કરવામાં આવ્યું હતું. ખેરગામના પોમાપાળ ફળિયાના સામાજિક અગ્રણી તથા LIC ડેવલપમેન્ટ ઓફિસર શ્રી જયેશભાઈ પટેલના પરિવારના સૌજન્યથી વિદ્યાર્થીઓને શૈક્ષણિક કીટનું વિતરણ કરવામાં આવ્યું. નોંધનીય છે કે તેમના પરિવાર દ્વારા છેલ્લા આઠ વર્ષથી સતત અને નિઃસ્વાર્થ ભાવથી આ સેવાકીય કાર્ય કરવામાં આવી રહ્યું છે, જે શિક્ષણ પ્રત્યેની તેમની પ્રતિબદ્ધતા અને સમાજસેવાની ભાવનાનું ઉત્તમ ઉદાહરણ છે. આ પ્રસંગે તાલુકા પંચાયતના પૂર્વ સદસ્યશ્રી વિભાબેન પટેલ, શ્રી કલ્પેશભાઈ પટેલ, શ્રી પંકજભાઈ પટેલ તેમજ શાળાના શિક્ષકગણ અને સ્ટાફ ઉપસ્થિત રહ્યા હતા. મહાનુભાવોએ વિદ્યાર્થીઓને મન લગાવી અભ્યાસ કરવા અને જીવનમાં આગળ વધવા પ્રેરણા આપી હતી. કાર્યક્રમના અંતે શાળા પરિવાર વતી શાળાના આચાર્યશ્રી વાસંતીબેન પટેલે શ્રી જયેશભાઈ પટેલ અને તેમના પરિવારનો આ ઉમદા સહયોગ બદલ હૃદયપૂર્વક આભાર વ્યક્ત કર્યો હતો.
ખેરગામ ખાતે સરદાર પટેલની જન્મજયંતી નિમિત્તે રન ફોર યુનિટી કાર્યક્રમ યોજાયો.
ખેરગામમાં લોખંડી પુરુષ સરદાર વલ્લભભાઈ પટેલની જન્મજયંતી નિમિત્તે રન ફોર યુનિટીનું આયોજન કરાયું હતું. અખંડ ભારતના નિર્માતા લોખંડી પુરુષ સરદાર વલ્લભભાઈ પટેલની જન્મજયંતી રાષ્ટ્રીય એકતા દિવસ નિમિત્તે ખેરગામના પ્રશાંતભાઈ પટેલ, ડેપ્યુટી સરપંચ જગદીશ ઉર્ફે જિગ્નેશભાઈ પટેલ, ચેતનભાઈ પટેલ, સામાજિક અગ્રણી દિનેશભાઈ પટેલ સહિતના આગેવાનો દ્વારા રન ફોર યુનિટીનું આયોજન કરવામાં આવ્યું હતું.
જેમાં ખેરગામ પોલીસ સ્ટાફ તેમજ મોટી સંખ્યામા યુવાનો રાષ્ટ્રીય એકતા માટે જોડાયા હતા. ખેરગામના બિરસા મુંડા સર્કલ પાસે પીએસઆઇ ડી.આર. પઢેરીયાએ લીલી ઝંડી બતાવી રન ફોર યુનિટીની શરૂઆત કરાવી હતી. જે ગાંધી સર્કલથી ડૉ. બાબાસાહેબ આંબેડકર સર્કલ પાસે પૂર્ણ કરવામાં આવી હતી. દોડમાં પ્રથમ ક્રમાંક આવનાર મીરજભાઈ પટેલને સ્પોર્ટ શૂઝ, દ્વિતીય ક્રમાંક પ્રાપ્ત કરનાર અક્ષયભાઈ પટેલને અને ૧૦ વર્ષની ભવ્યા અલ્પેશ ગજ્જરને ટ્રોફી ઉપસ્થિત મહેમાનોના હસ્તે આપી સન્માનિત કરવામાં આવ્યા હતા.
આ પ્રસંગે ન્યાય સમિતિના અધ્યક્ષ પૂર્વેશ ખાંડાવાલા, ભૌતેશ કંસારા,માજી સરપંચ કાર્તિક પટેલ, ડો.ગુલાબ પટેલ, જગદીશ પટેલ, હર્ષદ પટેલ, આશિષ ચોહાણ સહિતના આગેવાનો ઉપસ્થિત રહ્યા હતા.
Comments
Post a Comment