ખેરગામ પોમાપાળ પ્રાથમિક શાળામાં વિદ્યાર્થીઓને શૈક્ષણિક કીટનું વિતરણ ખેરગામ, તા. 18 જૂન 2026: ખેરગામ તાલુકાની પોમાપાળ પ્રાથમિક શાળામાં વિદ્યાર્થીઓના શૈક્ષણિક વિકાસને પ્રોત્સાહન આપવાના ઉદ્દેશ્યથી શૈક્ષણિક કીટ વિતરણ કાર્યક્રમનું આયોજન કરવામાં આવ્યું હતું. ખેરગામના પોમાપાળ ફળિયાના સામાજિક અગ્રણી તથા LIC ડેવલપમેન્ટ ઓફિસર શ્રી જયેશભાઈ પટેલના પરિવારના સૌજન્યથી વિદ્યાર્થીઓને શૈક્ષણિક કીટનું વિતરણ કરવામાં આવ્યું. નોંધનીય છે કે તેમના પરિવાર દ્વારા છેલ્લા આઠ વર્ષથી સતત અને નિઃસ્વાર્થ ભાવથી આ સેવાકીય કાર્ય કરવામાં આવી રહ્યું છે, જે શિક્ષણ પ્રત્યેની તેમની પ્રતિબદ્ધતા અને સમાજસેવાની ભાવનાનું ઉત્તમ ઉદાહરણ છે. આ પ્રસંગે તાલુકા પંચાયતના પૂર્વ સદસ્યશ્રી વિભાબેન પટેલ, શ્રી કલ્પેશભાઈ પટેલ, શ્રી પંકજભાઈ પટેલ તેમજ શાળાના શિક્ષકગણ અને સ્ટાફ ઉપસ્થિત રહ્યા હતા. મહાનુભાવોએ વિદ્યાર્થીઓને મન લગાવી અભ્યાસ કરવા અને જીવનમાં આગળ વધવા પ્રેરણા આપી હતી. કાર્યક્રમના અંતે શાળા પરિવાર વતી શાળાના આચાર્યશ્રી વાસંતીબેન પટેલે શ્રી જયેશભાઈ પટેલ અને તેમના પરિવારનો આ ઉમદા સહયોગ બદલ હૃદયપૂર્વક આભાર વ્યક્ત કર્યો હતો.
નાનાપોંઢા ક્રિકેટ ટુર્નામેન્ટમાં 32 ટીમોની ટુર્નામેન્ટમાં નગર ગામની ટીમ ચેમ્પિયન બની.
- ધારાસભ્ય જીતુ ચૌધરીના હસ્તે ચેમ્પિયન ટીમને રૂ.15,000નો પુરસ્કાર.
- રનર્સ અપ માલનપાડા ટીમને રૂ.7,500નો પુરસ્કાર
કપરાડા તાલુકાના નાનાપોંઢા સ્થિત જય બજરંગબલી સ્ટેડિયમ ખાતે યોજાયેલી આદિવાસી કુકણા સમાજની ક્રિકેટ ટુર્નામેન્ટમાં કપરાડા તાલુકાના નગર ગામની ટીમ, ફાઇનલમાં માલનપાડા ટીમને હરાવી ચેમ્પિયન બની હતી. સમાજને એક સૂત્રતામાં બાંધી રાખવા અને દરેક ક્ષેત્રે સમાજને આગળ લાવવા માટેના પ્રયાસોના ભાગરૂપે નાનાપોંઢા ખાતે યોજાયેલી ક્રિકેટ ટુર્નામેન્ટમાં વલસાડ, ધરમપુર અને કપરાડા તાલુકાની કુલ 32 ટીમે ભાગ લીધો હતો. જેમાં ફાઈનલ મેચ નગર ઇલેવન અને માલનપાડા ઇલેવન વચ્ચે રમાઇ હતી. ભારે રસાકસી બાદ નગર ઇલેવન ટીમનો વિજય થયો હતો. પૂર્વ મંત્રી અને ધારાસભ્ય જીતુ ચૌધરીના હસ્તે ચેમ્પિયન ટીમને રૂ.15,000નો અને રનર્સ અપ માલનપાડા ટીમને રૂ.7,500નો પુરસ્કાર અપાયો હતો. આ પ્રસંગે સમાજના આગેવાનો મોટી સંખ્યામાં ઉપસ્થિત રહ્યા હતા.
Comments
Post a Comment